A campaña ‘Toponimízate’ sae de xira coa RAG polas catro provincias galegas

Toponimízate. Falámosche dos nomes da túa terra é unha das novas campañas da Real Academia Galega (RAG) que chegará este outono a unha ducia de concellos das catro provincias. Mediante charlas, o público coñecerá a orixe e o significado dos topónimos que designan os seus municipios, parroquias, aldeas ou accidentes xeográficos e aprenderá ademais como empregar a aplicación Galicia Nomeada, que lle permite á cidadanía colaborar na recolla de nomes de leiras, fontes, camiños ou devesas que corren o risco de se perder.

As paradas da sexta edición da campaña, coordinada pola RAG co apoio económico da Secretaría Xeral de Política Lingüística, serán desta volta Padrón, Dumbría e Narón na provincia da Coruña; Friol, Becerreá e A Pobra do Brollón na de Lugo; Maceda, Amoeiro e Trasmiras na de Ourense e Vila de Cruces, Tui, Ponte Caldelas na de Pontevedra.