A CORUÑA EMPRENDE

O CIFP Paseo das Pontes pon á venda os produtos da súa miniempresa

Alumnos do centro crearon un proxecto de producción e venda de comida

03.03.2016 | 16:21
Alumnos do CIFP As Pontes venden os produtos de Dircomida no centro educativo.

Despois de moitas horas de traballo, os alumnos do CIFP Paseo das Pontes da Coruña participantes no proxecto de miniempresas do programa A Coruña Emprende 2 puideron amosar esta semana aos seus compañeiros e docentes do centro o resultado de tanto esforzo coa presentación esta semana das propostas do seu proxecto Dircomida. Os estudantes do ciclo de Direccción de Cociña turnaronse estes días para preparar os dóces e os bocadillos para vender no centro e tanto o pasado mércores como hoxe o traballo foi dobre ao contar tamén con pedidos de lasaña, polo asado, croquetas e empanada por encargo. O exceso de demanda sorprendeu aos integrantes de Dircomida, que no primeiro día tiveron que facer fronte a este contratempo e ademais da producción que tiñan en stock conxelada tiveron que seguir elaborando menús para abastecer aos clientes, como comenta Alicia Abal, unha das participantes no proxecto. O mesmo pasou coa lista de pedidos -destaca- que xa houbo que retirala ao pouco tempo de colgala para que tivesen marxe de preparar todas as comandas. A "coordinación" entre a veintena de participantes do 2º curso do módulo de Dirección de Cociña xunto con outros dous cursos subcontratados permitiu que o traballo realizado se puidese levar a práctica con éxito superando tódalas expectativas. A "implicación" foi "absoluta" por parte de todo o centro co deseño do marketing e o merchandising por parte de alumnas do módulo de Patronaxe e tres estudiantes de arte gráfica que se encargaron da decoración.

Hoxe remata unha semana coa que se pon o broche a horas de traballo pensando os pratos, os prezos, redactando contratos de traballo para esta empresa simulada, aínda que moi próxima á realidade, subcontratando a alumnos doutros cursos e a unha exalumna para o etiquetado e da declaración de alérxenos... Pero finalmente as contas cadran e descubriron que a súa empresa foi moi rendible e que co exceso de demanda nin sequera tiveron que promocionar Dircomida fóra do centro como tiñan previsto. Abal destaca que están moi "contentos" cos resultados e que o esforzo "mereceu a pena". Aclara que tódolos participantes sacaron algo de proveito e de cara o seu futuro laboral descubriron que abrir un negocio de restauración "non é só acondicionar un local, producir e vender" porque hai moitas máis disciplinas que hai que ter en conta.

O CIFP Paseo das Pontes foi un dos catro centros educativos da Coruña e a súa área metropolitana seleccionados para formar parte do proxecto miniempresas de A Coruña Emprende 2, unha das novidades da segunda edición do programa coordinado pola Consellería de Cultura, Educación e Ordenación Universitaria, financiado pola Fundación Alcoa e no que colabora LA OPINIÓN. Ademais deste centro tamén traballan nesta iniciativa, que busca fomentar a creación de empresas simuladas nas aulas, o IES de Viós de Abegondo, o IES Universidade Laboral de Culleredo e o IES Isaac Díaz Pardo de Sada. A Coruña Emprende 2 inclúe xornadas formativas, reunións con empresarios e visitas a empresas.

Compartir en Twitter
Compartir en Facebook
 

esquelasfunerarias.es
Enlaces recomendados: Premios Cine