Goretti Sanmartín Número dous da lista encabezada por Ana Pontón

"Non hai que volver atrás, o BNG ten que saber que nacionalismo necesita a sociedade actual"

"Temos que modernizar o discurso e as mensaxes" - "Sería dramático que non existira unha alternativa nacionalista: é un dereito e unha necesidade para a poboación"

23.02.2016 | 15:26
Goretti Sanmartín, no seu despacho na Deputación da Coruña.
Gorett Sanmartín
"Soberanía e necesidades sociais están ligados: necesitamos ter soberanía para decidir e garantir dereitos "

Tras o fracaso electoral nas xerais, o BNG fixará o domingo o seu novo rumbo cara a vindeira cita coas urnas: as autonómicas previstas para despois do verán. Goretti Sanmartín, vicepresidenta da Deputación da Coruña e número dous da candidatura oficial para a XV Asemblea Nacional do Bloque, recoñece que hai que mudar o discurso para conseguir un nacionalismo "moderno e innovador". Non é das que lle gusta mirar cara atrás: "Non temos que ser o que fomos nun momento histórico", reflexiona Sanmartín, ao tempo que advirte de que hai que "saber que nacionalismo necesita a sociedade do século XXI"

-Para recetar unha menciña, antes hai que diagnosticar a doenza. Que diagnose fai do mal que levou ao BNG ao batacazo do 20-D e a convocar a asemblea para fixar un novo rumbo?

-Decidimos de maneira colectiva facer unha análise conxunta, a fondo e demorada. Temos que actualizar o discurso e as mensaxes. O obxectivo fundamental desta asemblea é abrir unha nova etapa no BNG coñecendo os cambios sociais máis importantes dos últimos tempos, conseguindo que a xente vexa o nacionalismo como un instrumento útil. Nunha situación complicada e complexa precisamos ter tempo suficiente para falar con toda a base social e chegar a outros ámbitos para rematar nun proceso de refundación do BNG.

-Fala de actualizar discurso e mensaxes. Tamén falta sintonía coa cidadanía e houbo problemas de liderazgo?

- O portavoz nacional fixo un traballo magnífico. Non é unha cuestión de liderazgo. É unha cuestión colectiva, de chegar a grandes acordos sobre o futuro do BNG. Hai que reforzar a idea de que é importante a presenza do nacionalismo. Historicamente a xente percibíao, pero agora non tanto.

-Cara onde debe ir o Bloque para a conectar coa cidadanía?

-Non temos que volver atrás e ser o que fomos nun momento histórico, senón saber que nacionalismo necesita esta sociedade do século XXI. Temos que ofrecer un nacionalismo moderno e innovador, que defende o dereito dos pobos e os dereitos das persoas Para eso, temos que chegar a todas esas persoas que se senten nacionalistas, galeguistas, soberanistas e que senten Galiza. Falarlles do ti a ti.

-Esqueceuse o Bloque de falar do ti a ti nos últimos tempos?

-Está claro que houbo un problema na comunicación das mensaxes. Temos que conseguir chegar á mocidade e que haxa unha alternativa nacionalista neste país. Sería dramático que non existira unha alternativa nacionalista. É un dereito e unha necesidade para a nosa poboación, para ter posibilidades de decicir e vivir mellor nos distintos ámbitos, que os intereses dos galegos estean defendidos como sempre estiveron cando o nacionalismo tivo forza e presenza importante.

-Dos 50 membros do Consello Nacional repiten 30. Pódese renovar o discurso coa mesma xente?

-Fixemos un equipo no que mesturamos coñecemento, capacidade política, dispoñibilidade temporal e renovación. Se se colle ás persoas sobre as que vai caer o maior peso, na proposta de 15 hai dez novas, polo tanto a renovación é de dous terzos. Sería bo que se incorporasen persoas para afondar na liña política que debe levar a organización nos próximos tempos.

-Nalgúns partidos parece que non hai banquillo e hai problemas para atopar un candidato ás vindeiras autonómicas. Como é o banquillo do Bloque?

-Nestes momentos non estamos a falar de banquillo nin candidaturas ás eleccións galegas. Funcionamos en colectivo e as decisión individuais tomaranse cando chegue o seu tempo. Posibilidade e personas capaces dentro do BNG? Moitas.

-Botando a vista atrás, arrepíntese o BNG de non concurrir con En Marea nas xerais?

-Tentamos facer unha candidadura en chave galega pero non se puido conseguir porque houbo outras forzas que non quixeron ese compromiso. Moitas veces a política non se move cun xa foi, senón mirando cara o futuro.

-Que impide ao BNG chegar ao entendemento cas mareas?

-Non existe ningún problema. Somos capaces de chegar a acordos, mesmo cogobernando con outras forzas. O BNG parte da idea da autoorganización, da necesidade de que existan forzas propias e que haxa alternativas que se xeren dentro do propio país. Eso non implica que non exista colaboración e posibilidades mesmo de coalicións electorais e traballar na mesma dinámica.

-Chegado o momento, que debería primar: o debate sobre a soberanía nacional ou as reivindicacións sociais?

-Para nós, o debate sobre a soberanía e as necesidades sociais é o mesmo. Precisamos ter soberanía para poder decidir e para garantir dereitos, que non son só os dereitos colectivos senón tamén os dereitos a unha vida mellor. E, iso tomando as nosas propias decisións. O social e o nacional está ligado. Con esa reivindicación da capacidade de decidir podemos conseguir vivir mellor, que se mire máis desde dentro o que necesitamos.

-A día do hoxe, que fórmula cobra máis forza para concurrir as próximas autonómicas.

-Temos unha asemblea nacional que vai tomar decisións sobre cuestións de liña política, o futuro do BNG e a fórmula concorrencia electoral. Imos agardar. O conxunto da militancia será o o que decida o camiño a comezar.

-Hai tempo suficiente ata as autonómicas para trasnmitir á cidadanía esa mensaxe de renovación ou córrese o risco de que os resultados do 20-D se repitan?

-Os tempos en política son vertixinosos. Pero desde as eleccións xerais o Bloque xa deu moitos pasos e comeuzou a traballar por un novo proxecto.

-Que obxectivos se marcan para as próximas autonómicas?

-Os tempos en política son importantes. Estamos centrados nesta asamblea naciona. Este é o primeiro paso. O segundo corresponderá á nova dirección, que formulará obxectivos de cara as próximas eleccións. Non imos adiantarnos.

-Pero algún mínimo de deputados se marcarán?

-Non existe neste momento, máis que a necesidade de transmitir a importancia da presenza nacionalista, a importancia que tivo no Parlamento e en todas as institucións unido ao inmenso traballo social. Mais non hai uns obxectivos concretos cuantificados nestes momentos.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


Enlaces recomendados: Premios Cine