POLÍTICA LINGÜÍSTICA

Valentín García presenta en Carballo o primeiro Plan de Dinamización da Lingua Galega no tecido económico

O titular de Política Lingüística destaca a "rendibilidade" do galego en termos comerciais

09.07.2016 | 01:04
O secretario xeral de Política Lingüística, Valentín García (esquerda) e o alcalde de Carballo, Evencio Ferrero, o pasado martes.

"O económico, por relevancia social, constitúe un sector de vital importancia para a promoción do uso da lingua galega e é por iso polo que desde o Goberno galego instamos a unha aposta conxunta e decidida pola implantación do idioma na economía, como valor económico, como sinal identitario e como patrimonio de todos os galegos e galegas".

Con estas mensaxes abriu o secretario xeral de Política Lingüística, Valentín García, o pasado mércores en Carballo o relatorio no que presentou o Plan de Dinamización no tecido económico 2015-2020 no marco do XII Curso de verán sobre dinamización lingüística. Traballando en lingua, promovido pola Universidade da Coruña e polo departamento que el mesmo dirixe. Durante dous días analizouse a situación do idioma no sector socioeconómico, os motivos desa situación e mais os factores condicionantes que a provocan e que poden ser tamén claves para mellorala.

"Debemos concienciar as empresas de que o uso da lingua galega é rendible en termos económicos, xera empatía cos consumidores e favorece a cordialidade e o afianzamento nas relacións comerciais e empresariais", salientou Valentín García.

135 axentes implicados

"Trátase do primeiro plan deseñado para desenvolver as directrices establecidas polo Plan xeral de Normalización da Lingua Galega (2004) e avanzar así na promoción do uso do idioma propio de Galicia desde o sector económico", recordou o titular de Política Lingüística, ao tempo que destacou que o documento "acordado e completado coas achegas de 135 axentes implicados no sector económico, por medio de numerosas conversas, encontros e reunións de traballo promovidas nos últimos meses, busca reforzar e consolidar o galego como valor engadido do ámbito empresarial, tanto dentro como fóra das nosas fronteiras".

Valentín García explicou polo miúdo o contido do novo plan, que aprobará o Consello da Xunta -órgano encargado de sancionalo- este mesmo mes, "e que articula un total de 84 medidas que incidirán no incremento do uso do galego e na súa visibilidade desde as 10 áreas que contempla o sector de aquí ao ano 2020"; "un cronograma de desenvolvemento e un amplo abano de medidas e accións que debemos considerar realistas e asumibles polos actores implicados desde o punto de vista da súa posta en marcha", puntualizou.

Crear conciencia de que o uso do galego favorece os resultados e obxectivos empresariais, estender o uso da lingua galega no ámbito económico, fomentar nos clientes e consumidores o hábito de usaren e reclamaren atención comercial en galego e estimular a creación e mantemento dunha demanda real e efectiva de produtos en galego son algúns dos principais obxectivos que recolle o proxecto.

O documento articúlase en 84 medidas -tanto específicas dun campo económico en particular como de carácter transversal- coas que incidir na promoción social da lingua desde a economía por medio das 10 áreas nas que se estrutura esta: hostalería, comercio, alimentación, TIC, construción e inmobles, banca, asesoramento e intermediación, axencias de publicidade, área de traballo e cooperativismo.

O desenvolvemento do Plan de Dinamización da Lingua Galega será paulatino e levarase a cabo en cinco anos, cun orzamento global de máis de 5.000.000 euros.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


Enlaces recomendados: Premios Cine