Chega 'Bibopalula', a primeira serie musical de debuxos en galego

Que teñen en común un paporrubio, unha pega, un picapau e un merlo? Ademais de ser paxaros moi comúns en Galicia son os protagonistas de Bibopalula, a primeira serie musical de animación en galego. A Banda do Bosque está formada por Robin, Pegui, Carpin e Merli; uns paxariños que levan as súas cancións alá onde van e cos que aprenderemos a importancia da curiosidade, o respecto dos ciclos da natureza, o valor da amizade e a maxia da música.

A trama de Bibopalula xira ao redor dos acontecementos diarios do bosque no que viven os seus protagonistas. En capítulos breves, de aproximadamente 5 minutos, os catro amigos descubren algo que esperta a súa curiosidade e non paran ata entender o que está acontecendo. Para iso, contan coa axuda doutros habitantes do bosque como o Señor Moucho, a Cegoña, o Pombo Mensaxeiro, o Capitán Pelícano ou a Señora Curuxa. Andrés Mahía e Laura Mahía son os creadores desta ambiciosa serie que busca ser referencia para os espectadores primeirizos, ofrecendo un contido pensado e creado en Galicia por un equipo de empresas e profesionais locais.

Os primeiros 20 capítulos da serie xa están dispoñibles en aberto a través de xabarin.gal e a aplicación Xabarín da Televisión de Galicia. A música é a gran protagonista da serie, cada capitulo ten unha conclusión en forma de canción. Un tema orixinal que a Banda do Bosque interpreta nun videoclip ou ao vivo no escenario do bosque. Todas estas cancións foron compostas por Santi Jul e Iván Laxe, dous dos músicos máis recoñecidos do audiovisual galego. As voces dos personaxes principais póñenas Melania Cruz, Iria Lamas, Marta Lado, Marita Martínez e Xosé A. Touriñán.

Unha aposta polos contidos en galego

Bibopalula é un novo proxecto de Undodez para ofrecer entretemento de calidade en galego e que as nenas e nenos de Galicia poidan aprender e divertirse na nosa lingua. Como parte desta aposta, a serie contará con contidos complementarios para poder desfrutar máis alá das pantallas, coa edición de contos baseados nos personaxes, o lanzamento das cancións a través das principais plataformas de streaming e, da man de Ainé, os seus creadores están traballando tamén no espectáculo en vivo.

Para estar ao día de todas as novidades de Bibopalula, podes seguir as súas contas nas redes sociais Facebook e Instagram ou visitar bibopalula.gal, a plataforma de referencia desde a que acceder a todos os contidos da serie. A primeira temporada chega á televisión pública As aventuras da Banda do Bosque están dispoñibles na plataforma de contidos dixitais infantís da Televisión de Galicia. Logo destes 20 primeiros capítulos, a temporada completarase cun total de 55 episodios das aventuras de Robin, Pegui, Carpin e Merli. Pódese acceder a un adianto da serie neste link.